ಕಥೆ ಹೇಳುವೆ

‘ಕಥೆ ಹೇಳುವೆ’ ಪುಸ್ತಕದಲ್ಲಿ ಸುಕನ್ಯಾ ಕನಾರಳ್ಳಿಯವರು ಜಗತ್ತಿನ ಮುಖ್ಯ ಕಥೆಗಳೆಂದು ಕೆಲವನ್ನು ಆಯ್ಕೆ ಮಾಡಿಕೊಂಡು ಅನುವಾದಿಸಿದ್ದಾರೆ. ಇವೆಲ್ಲವೂ ಲೇಖಕಿಯರ ಕಥೆಗಳು. ಹದಿನಾಲ್ಕು ಕತೆಗಾರ್ತಿಯರು ಇಲ್ಲಿ ಜಾಗ ಪಡೆದಿದ್ದಾರೆ. ಬಹುತೇಕ ಎಲ್ಲಾ ಕಥೆಗಳೂ ಭಿನ್ನತೆಯನ್ನು ಪಡೆದುಕೊಂಡಿವೆ. ಕೆಲವು ಕತೆಗಳು ಭಾರತೀಯ ಗಡಿಯನ್ನು ಮೀರಿದ್ದರೂ ಸಂವೇದನೆಯ ದೃಷ್ಟಿಯಿಂದ ಅನ್ಯವೇನಲ್ಲ. ಇಲ್ಲಿನ ಪಾತ್ರಗಳು ಪಡಬಾರದ ಕಷ್ಟಗಳನ್ನು ಪಟ್ಟಿವೆ ಎಂದರೆ ಕ್ಲೀಷೆಯಾಗುತ್ತದೆ. ಈ ಕಥೆಗಳಲ್ಲಿ ಬರುವ ಹಲವರು ಇಡೀ ವ್ಯವಸ್ಥೆಯೊಂದಿಗೆ ಮಾಡಿಕೊಳ್ಳುವ ರಾಜಿ ಯಾವ ಬಗೆಯದು? ಆ ಬಗೆಯ ರಾಜಿಯಾದರೂ ಕಾಲಕ್ರಮೇಣ ವ್ಯವಸ್ಥೆಯನ್ನು ಬದಲಿಸುವ ತೀರ್ಮಾನಗಳ ಗಟ್ಟಿತನವನ್ನು ತೋರಿಸುವ ವಿಧಾನಗಳು ಇಲ್ಲಿವೆ. ಯಾವುದೋ ವಾದಗಳ ಚೌಕಟ್ಟಿನಲ್ಲಿ ಇಲ್ಲಿನ ಸ್ತ್ರೀ ಜಗತ್ತನ್ನು ಗಮನಿಸಿದರೆ ಆ ಚರ್ಚೆ ಬೇರೊಂದು ಕಡೆಗೆ ಚಲಿಸಬಹುದು. ಪ್ರಶ್ನೆ ಇರುವುದು, ಚರಿತ್ರೆಯನ್ನು ಕಟ್ಟುವ ಶಕ್ತಿ ಮಹಿಳೆಗಿದ್ದರೂ ತಪ್ಪಿಸುತ್ತಿರುವುದು ಯಾರು ಎಂಬುದು. ಪುರುಷನಿಗೆ ಕಾಡುವ ಸಮಸ್ಯೆಗಳನ್ನೂ ಹೆಣ್ಣಿಗೆ ಎದುರಾಗುವ ದುಃಖ ಮತ್ತು ಸಂವೇದನೆಗಳ ದೃಷ್ಟಿಯಿಂದ ನೋಡುವ ಅಗತ್ಯಗಳು ಇಲ್ಲಿವೆ.